Son günlər Mehdi Hüseynzadə adına Sumqayıt şəhər stadionunda keçirilən oyunlarla bağlı sosial şəbəkələrdə azarkeşlərin narazılığı diqqət çəkir. Onlar əsasən sıxlıq və təmizlik məsələlərinə dair iradlarını bildirirlər.
Məsələ ilə bağlı "Sumqayıt" Futbol Klubunun (FK) mətbuat katibi Zaur Xudiyev İdman.Biz-ə açıqlama verib.
O bildirib ki, azarkeşlər klub üçün ən önəmli faktordur və oyun zamanı yaranan sıxlıqlar nəzərə alınaraq təhlükəsizlik və giriş planlamaları həyata keçirilir.
"Hər matç yalnız azarkeşlər üçün keçirilir və onlar olmadan oyun tam deyil. Hətta bir azarkeş belə narazı qalsa, bizim üçün önəmlidir və biz bu problemi aradan qaldırmağa çalışırıq. Oyun zamanı sıxlıq və təmizliklə bağlı çətinliklər ola bilər. Stadionda hər bir tədbir oyundan əvvəl planlaşdırılır: azarkeş sayına uyğun təhlükəsizlik tədbirləri, polis nəzarəti və bilet yoxlama məntəqələri təşkil edilir. Stadionun giriş qapıları hər oyundan bir saat əvvəl açılır ki, insanlar tədricən daxil olsun və sıxlıq yaranmasın.
Təmizlik məsələsi isə əsasən azarkeşlərin öz davranışlarından qaynaqlanır. Stadion ərazisindəki sanitar qovşaqlardan oyun zamanı azarkeşlər özü istifadə edir. Əgər orada natəmizlik yaranırsa, bu əsasən onların öz davranışlarından qaynaqlanır. 90 dəqiqə ərzində bütün sanitar qovşaqları təmizləmək mümkün deyil. Əgər problem oyundan əvvəl və ya sonra yaranarsa, onda bu iradlarla razı olardım".
Zaur Xudiyev son olaraq klubun azarkeşlərinə müraciət edib:
"Sizin vasitənizlə azarkeşlərə səslənərək onlardan xahiş edirəm ki, oyunlara vaxtında gəlsinlər, yerlərini əvvəlcədən tutsunlar və klubun tədbirlərinə anlayışla yanaşsınlar. Bu həm onların, həm də komandanın rahatlığı üçün vacibdir".
Qeyd edək ki, bu gün Misli Premyer Liqasının XII turunun ikinci oyunu "Sumqayıt"la "Qarabağ" arasında baş tutacaq. Saat 19:00-da start götürəcək qarşılaşmanı Fərid Hacıyev idarə edəcək.
