"On il əvvəl yaşımla əlaqədar mədəni şəkildə Sumqayıt Dövlət Dram Teatrından kənarlaşdırılmışam. Yaş məhdudiyyətinin teatrlara şamil edilməsi səhv düşüncədir. Axı səhnə aktyorun ikinci vətənidir".
Bu fikirləri Xalq artisti Məzahir Süleymanov Adalet.az-a açıqlamasında bildirib.
O, Mədəniyyət Nazirliyindən heç kəsin onunla maraqlanmadığını qeyd edib:
"Bilirsiniz ki, Xalq artistlərinin 99%-i Prezident təqaüdü alır. Ancaq nədənsə bu təqaüd mənə verilmir. Səbəbini də bilmirəm, heç bununla maraqlanmamışam. On il əvvəl yaşımla əlaqədar mədəni şəkildə Sumqayıt Dövlət Dram Teatrından kənarlaşdırılmışam. Rəhbərlik teatrda aktyorlara yaş məhdudiyyəti qoyulduğunu dedi. Hazırda 81 yaşım var, heç bir aidiyyəti qurum nəinki maddi, heç mənəvi də dəstək olmayıb.
Bütün bunlar insanın sənət ruhuna təsir edir. Yaş məhdudiyyətinin teatrlara şamil edilməsi səhv düşüncədir. Axı səhnə aktyorun ikinci vətənidir. Artıq bircə arzum var ki, Allah verdiyi ömrü sağlam yaşayım".
