Sumqayıtda icbari tibbi sığorta ilə əməliyyat olunan xəstədən pul alınması narazılıq yaradıb.
Tribunainfo.az-ın məlumatına görə, vətəndaş Əliyev Təbrizin anası bildirib ki, oğlunun sağ ayağından aldığı zədə ilə Sumqayıt Travmatologiya şöbəsinə müraciət edib.
Rentgen müayinəsindən sonra vətəndaşa ayağında üç yerdən sınıq və ya qırıq olduğu bildirilərək mil (metall konstruksiya) taxılması məqsədilə əməliyyata cəlb olunub.
Vətəndaşın sözlərinə görə, əməliyyat icbari tibbi sığorta çərçivəsində aparılsa da, ondan 800 manat məbləğində ödəniş alınıb. Əməliyyatı həyata keçirən Fuad adlı cərrah olub.
Xəstənin anası səhiyyəyə şikayət etsə də, vətəndaşa "get hara şikayət edirsən, et", – deyilib.
Hadisə ilə bağlı tibbi ekspert, həkim-terapevt Rasif Bağırov qeyd edib ki, ümumiyyətlə, hazırda cərrahi əməliyyatlarda sığorta ilə əməliyyat olunan xəstələrin heç birindən 1 manat belə pul alınmamalıdır:
"Mən başa düşə bilmirəm, ürəyinə stend qoyurlar xəstələrdən ödəniş almırlar. Amma xüsusilə travmotoloqların gəlib xəstələrdən bu qədər pul almağı düzgün deyil. Qanun var, pulsuz əməliyyat etməlisən. Çünki hökumət sənə sığorta ilə pul verir. Əlavə olaraq sən niyə xəstələrdən pul tələb edirsən?! Ona görə də, demək istəyirəm ki, hazırda bizim də qulağımıza bəzi səs-soraqlar gəlir ki, açıq-aydın, dil ilə xəstələrdən pul istəyirlər. Bu artıq azğınlaşmadır. Əvvəlki dövrlərdə xəstələrdən külli miqdarda pul alınırdı. İndi, həmin o pulu ala bilməyəndə azğınlaşmağa başlayıblar. Konkret qərar çıxarılıb ki, pul almaq olmaz. Bu qanunsuzluqdur".
Qeyd edək ki, hazırda məsələ TƏBİB tərəfindən araşdırılır.
