Sumqayıt Apellyasiya Məhkəməsində dələduzluqda təqsirləndirilən Uğur Talehovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Rəşadət Ağayevin sədrliyi ilə keçirilən prosesdə şikayət təmin edilməyib.
İttihama görə, o, tamah niyyəti ilə, özgənin əmlakını aldatma və ya etibardan sui-istifadə etməklə ələ keçirmək məqsədilə bir sıra dələduzluq əməllərini törədib.
Belə ki, 2023-cü ilin may ayının ortalarında təqsirləndirilən şəxs zərərçəkmiş T.T.-nin (adı, soyadı şərtidir) onu əvvəldən tanımasına və bibisi oğlu ilə yaxın münasibətlərinə istinad edərək, etibarından sui-istifadə edib. O, zərərçəkmiş şəxsi Dövlət Neft Şirkətində (SOCAR) şöbə müdiri vəzifəsinə təyin etdirəcəyini yalan vəd verərək aldadıb və Sumqayıt şəhəri, Bulvar ərazisində 40 000 manat pulunu alaraq şəxsi ehtiyaclarına xərcləyib. Nəticədə zərərçəkmişə xeyli miqdarda maddi ziyan dəyib.
Bundan əlavə, Uğur Talehov tamah niyyəti ilə, özgənin əmlakını aldatma və ya etibardan sui-istifadə etməklə 04 fevral 2023-cü il tarixdə zərərçəkmiş şəxs Q.Q.-nin (adı, soyadı şərtidir) işlədiyi Bakı şəhəri, Binəqədi rayonu ərazisindəki üzlük daşları emalı sexində satıcı işləyən şəxsin etibarından sui-istifadə edib. O, "SLB Construction Group" inşaat şirkətinə məxsus Sumqayıt şəhəri, Bulvar ərazisində tikilən "Bağçaşəhər" yaşayış kompleksinin binalarına üzlük daşlarının təmin ediləcəyini və hər ayın sonunda dəyərinin ödəniləcəyini yalan vəd verib.
Təqsirləndirilən şəxs mart ayının əvvəllərindən 10 avqust 2023-cü ilədək olan müddətdə təhvil aldığı daşların ümumi dəyəri 42 000 manat olmasına baxmayaraq, 35 179 manatını ödəməyib. Bu yolla zərərçəkmiş şəxsə xeyli miqdarda maddi ziyan vuraraq dələduzluq edib.
Qeyd edək ki, Uğur Talehov Cinayət Məcəlləsinin 178.2.2-ci (dələduzluq), 178.2.3 və 178.2.4-cü maddələri ilə təqsirli bilinərək məhkum olunub.
