Sumqayıtda xəyanət görə həyat yoldaşını qətlə yetirən kişi hökmdən narazıdır.
Sumqayit24.az-ın məlumatına görə, hadisə bu ilin yanvarın 22-də, şəhərin 12-ci mikrorayon ərazisində qeydə alınıb.
İttihama görə, 1989-cu il təvəllüdlü Ağabala şəhər ərazisində avtomobil kirayəsi ilə məşğul olub. Onun həyat yoldaşı, 1993-cü il təvəllüdlü Səbinə isə evdar qadın olub. Cütlüyün birgə nikahdan 3 övladı olub.
Bir gün Ağabala həyat yoldaşı Səbinənin telefonuna baxarkən "Whatsapp"da yazılan mesajın silindiyini görüb. Bu səbəbdən arvadının xəyanətindən şübhələnməyə başlayıb. O, Səbinənin telefonunun "WhatsApp" mesencerini öz mobil telefonuna yönləndirib və qadını izləyib. Bununla yanaşı, Ağabala öz mobil telefonunun səsyazma proqramını aktiv edərək, smartfonu evin girişindəki dolabın üstünə qoyaraq evdən çıxıb. Telefon evdə iki gün bütün səsləri qeydə alıb.
İki gündən sonra o, telefonu götürüb səs yazılarına qulaq asanda, evə yad kişinin gəldiyindən əmin olub. Ağabala gecə saat 3 radələrində həyat yoldaşını oyadaraq həmin səsin kimə məxsus olduğunu soruşsa da, Səbinə heç nəyi etiraf etməyib.
Kişi qısqanclıq səbəbindən mətbəxdən götürdüyü bıçaqla arvadına 18 dəfə zərbə endirərək onun həyatına son qoyub.
O, daha sonra könüllü şəkildə polisə təslim olub və hadisəni etiraf edib. Polis əməkdaşları Ağabalanı saxlayıb və istintaqa təhvil veriblər.
Bu cinayət işinə Sumqayıt Ağır Cinayətlər Məhkəməsində baxılıb. Sənan 18 il azadlıqdan məhrum edilib, cəzasını ciddi rejimli cəzaçəkmə müəssisəsində çəkməsi müəyyən edilib.
Hökmdən narazı qalan təqsirləndirilən şəxs apellyasiya şikayəti verib. Sumqayıt Ağır Cinayətlər Məhkəməsinin mübahisələndirilən hökmünün ləğv edilməsini, əməlinin Cinayət Məcəlləsinin 122.1-ci (zərərçəkmiş şəxs tərəfindən edilən zorakılıq, ağır təhqir və ya sair qanunsuz və ya əxlaqsız hərəkətlər (hərəkətsizlik) nəticəsində, habelə zərərçəkmiş şəxsin mütəmadi qanunsuz və ya əxlaqsız davranışı ilə əlaqədar yaranmış uzun sürən dözülməz psixi şərait nəticəsində qəflətən baş vermiş güclü ruhi həyəcan (affekt) vəziyyətində qəsdən adam öldürmə) maddəsinə tövsif edilməsini, barəsində həmin maddə ilə hökm çıxarılmasını xahiş edib.
Şikayətə zərərçəkmiş şəxsin hüquqi varisi etiraz edib.
Sumqayıt Apellyasiya Məhkəməsi şikayəti təmin etməyib.
