Sumqayıtda küçədə yaranan vəziyyət sakinlərin narazılığına səbəb olub.
Sumqayit24.az-a daxil olan məlumata görə, şəhərin 40-cı məhəlləsi, Bakı küçəsində uzun illərdir su borusunda texniki nasazlıq mövcuddur.
Yerli sakinlərin bildirdiyinə görə, sözügedən nasazlıq səbəbindən küçə daim suya qərq olur. Nəticədə asfalt örtüyü qısa müddətdə yararsız vəziyyətə düşür.
"Borudakı problem küçənin davamlı olaraq su ilə dolmasına səbəb olur. Bu da asfaltın tez bir zamanda sıradan çıxmasına gətirib çıxarır. Yeni asfalt çəkilsə də, əsas problem həll olunmadığından vəziyyət qısa müddət sonra yenidən təkrarlanır", – deyə şikayətçi qeyd edib.
Sakinlər aidiyyəti qurumların əraziyə baxış keçirməsini və problemin köklü şəkildə aradan qaldırılmasını tələb edirlər.
