"Bakı və Sumqayıt kimi sənaye şəhərlərində hava çirklənməsinin 70-75 %-i nəqliyyat vasitələrinin emissiyaları ilə bağlıdır".
Sumqayit24.az xəbər verir ki, bunu bu gün Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov parlamentin bir neçə komitəsinin ortaq iclasında "Azərbaycan Respublikasının 2026-cı il dövlət büdcəsi haqqında" qanun layihəsinin müzakirəsi zamanı deyib.
Komitə sədri bildirib ki, son əsrdə Azərbaycanda orta illik temperatur 0,4-1,3 dərəcə artıb, quraqlıq dövrləri 34 % çoxalıb, tozlu hava hadisələrinin sayı isə 5 dəfə artıb. Bu göstəricilər ölkənin iqlim transformasiyasına məruz qaldığını göstərir. Bunlar büdcədə nəzərə alınmalıdır.
"Bu baxımdan, iqlimlə əlaqədar məsələlərin dövlət büdcəsində də nəzərə alınması vacib hesab olunur. Xüsusilə elektrikli nəqliyyat vasitələrinin stimullaşdırılması, bərpa olunan enerji mənbələrinin inteqrasiyası və regional hava monitorinq sistemlərinin gücləndirilməsi istiqamətində tədbirlərin dəstəklənməsi məqsədəuyğundur".
