Sumqayıtda əlillərin bir qisminin bayram yardımından kənarda qaldığı iddia edilir.
Sumqayit24.az-a müraciət edən vətəndaşın sözlərinə görə, 3 dekabr – Beynəlxalq Əlillər Günü münasibətilə fiziki məhdudiyyətli şəxslərə 30 manat məbləğində maddi yardımın veriləcəyi bildirilib.
Şikayətçinin məlumatına əsasən, sözügedən yardım yalnız I qrup əlillərə təqdim olunub.
"Poçta müraciət etdikdə bildirirlər ki, yardım yalnız I qrup əlillərə verilir. Əgər belə idisə, niyə II və III qrup əlillərdən günlərlə arayış toplanıb, qeydiyyata alınmaları üçün vaxt sərf etdirilib? Maddi yardım niyə II və III qrup əlillərə aid deyil? Bu ayrı-seçkiliyə aydınlıq gətirilməsini xahiş edirik", – deyə yerli sakin narazılığını bildirib.
Vətəndaşlar məsələyə aidiyyəti qurumlar tərəfindən aydınlıq gətirilməsini tələb edirlər.
Qeyd edək ki, məsələ ilə bağlı aidiyyəti quruma sorğu ünvanlanıb.
