Sumqayıt Şəhər Məhkəməsində qəsdən sağlamlığa az ağır zərər vurmada və xuliqanlıqda təqsirləndirilən Ömər Tağıyevin (adı, soyadı şərtidir) cinayət işi üzrə məhkəmə istintaqı başa çatıb.
Pravda.az-ın məlumatına görə, hakim Günel İsmayılovanın sədrliyi ilə keçirilən prosesdə hökm oxunub.
Məhkəmənin hökmü ilə təqsirləndirilən şəxs əməlində Cinayət Məcəlləsinin 221.1-ci (xuliqanlıq) maddəsində nəzərdə tutulmuş cinayətin tərkibi olmadığından ona həmin maddə üzrə bəraət verilib. Ömər Tağıyev barəsində seçilmiş polisin nəzarəti altına vermə qətimkan tədbiri ləğv edilib.
İttihama görə, hadisə 01 yanvar 2025-ci il tarixdə, saat 00:40 radələrində Sumqayıt şəhərinin 9-cu mikrorayon ərazisində yerləşən "GATE 50 PUB" adlı obyektin yaxınlığında baş verib.
Belə ki, Ömər Tağıyev insident zamanı zərərçəkmiş Qulu Rəfiyev (adı, soyadı şərtidir) ilə heç bir əsaslı səbəb olmadan mübahisə edib.
İstintaqla müəyyən olunub ki, təqsirləndirilən şəxs mübahisə zamanı zərərçəkmiş şəxsin ünvanına nalayiq ifadələr işlədərək ictimai qaydanı qərəzli surətdə pozub, ətrafda olan şəxslərə qarşı açıq şəkildə laqeydlik nümayiş etdirib, cəmiyyətdə hamı tərəfindən qəbul edilmiş davranış qaydalarına, əxlaq və mənəviyyat normalarına saymamazlıq göstərməklə cəmiyyətə açıqca hörmətsizlik edib. Hadisə zamanı Ömər kənar şəxslərin gözü qarşısında Qulunu qəsdən yerə yıxaraq ona sağ əlin üst səthində bir ədəd, sağ əlin üçüncü barmağında isə bir ədəd sıyrıq kimi sağlamlığa zərər vurmayan və dərəcəsi təyin edilməyən xəsarətlər yetirib. Ardınca xuliqanlıq niyyəti ilə yumruqla zərərçəkmiş şəxsin sol göz nahiyəsindən qəsdən zərbə endirib. Nəticədə Quluya sol gözətrafı nahiyənin şişkinliyi və qançırı, göz qapaqlarının qançırı, gözün travmatik konyunktiviti, sol gözdə görmə itiliyinin pozulması kimi ümumi əmək qabiliyyətinin üçdə birindən az itirilməsinə səbəb olan, sağlamlığa az ağır zərər vurmaya aid bədən xəsarətləri yetirilib.
Beləliklə, təqsirləndirilən şəxsin hərəkətləri zərərçəkmiş şəxsin sağlamlığına qəsdən az ağır zərər vurmaqla müşayiət olunan qərəzli xuliqanlıq hərəkətləri kimi qiymətləndirilib.
