Sumqayıt şəhərində kişi həyat yoldaşı ilə mübahisə edən qonşusunu qaynı ilə birlikdə döyüb.
Pravda.az-ın məlumatına görə, Sumqayıt Şəhər Məhkəməsində xuliqanlıqda təqsirləndirilən İsrafil Əsədov və onun qayını Tağı Rəsulovun (hər ikisinin adı, soyadı şərtidir) cinayət işi üzrə məhkəmə istintaqı yekunlaşıb.
İttiham aktına görə, hadisə 26 noyabr 2022-ci il tarixdə saat 11 radələrində Sumqayıt şəhərinin 7-8-12-ci məhəllə ərazisində yerləşən "Dalğa" idman klubunun qarşısında qeydə alınıb.
Belə ki, zərərçəkmiş Namiq Hətəmov (adı, soyadı şərtidir) qonşusu İsrafil Əsədovun arvadı ilə mübahisə edib. İsrafil zərərçəkmiş tərəfindən qadının ünvanına səsləndirilmiş təhqiri bəhanə gətirərək ona irad bildirib.
Daha sonra İsrafil qaynı Tağı ilə birlikdə bir qrup şəxs halında zərərçəkmiş şəxsin bədəninin müxtəlif nahiyələrinə əlləri və ayaqları ilə çoxsaylı zərbələr endirib.
Hakim Günel İsmayılovanın sədrliyi ilə keçirilən prosesdə məhkəmənin hökmünə əsasən, İsrafil Əsədov Cinayət Məcəlləsinin 128-ci maddəsi ilə təqsirli bilinib. Lakin Cinayət Məcəlləsinin 75.1.1-ci maddəsinin tələblərinə əsasən cinayət məsuliyyətinə cəlbetmə müddəti keçdiyindən ona cəza təyin edilməyib. Eyni zamanda İsrafil Əsədov barəsində seçilmiş başqa yerə getməmək barədə iltizam qətimkan tədbiri ləğv edilib.
Zərərçəkmiş şəxsə qarşı vurulmuş mənəvi ziyana görə 7 000 manat məbləğində pul vəsaitinin, həmçinin ödənilmiş 90 manat məbləğində xərclərin tutulması barədə qaldırılmış mülki iddia baxılmamış saxlanılıb. Mülki iddia üzrə ödənilmiş 90 manat dövlət rüsumunun zərərçəkmiş şəxsə geri qaytarılması qərara alınıb.
