Sumqayıtda Məhəmməd Füzuli adına 15 saylı məktəbə gedən yol uşaqlar üçün ciddi təhlükəyə çevrilib.
Sumqayit24.az xəbər verir ki, bu barədə jurnalist Anar Xalarov sosial şəbəkə hesabında paylaşım edib.
O, qeyd edib ki, məktəbə gedən yol həm səhər, həm də axşam saatlarında xaotik vəziyyətdə olur:
"Səki illərdir zəbt edildiyi üçün uşaqlar və valideynlər məcbur qalaraq maşın yolundan istifadə edirlər. Bordürlər dağıldığı üçün səki yolla birləşib və ona görə istər dərsə uşaq gətirənlər, istərsə də istənilən bir şəxs maşınlarını həmin səkidə saxlayırlar. Nəticədə dərsə gedən uşaqlar maşın yolundan istifadə edirlər ki, bu da onların həyatı üçün təhlükə yaradır. Üstəlik, məktəbin qarşısından həm sağa (liseyə), həm də sola (5 mk-a) maşın yolları ayrılır. Təsəvvür edin, dərsdən çıxan uşaqlar 3 tərəfdən gələn maşınların əhatəsinə düşür. Sanki məktəb yolu yox, avto dayanacaq, nə bilim magistral yoldur".
Jurnalist bildirib ki, aidiyyəti qurumlar tərəfindən bu vəziyyətə təcili şəkildə müdaxilə edilməli, ən azı sağdakı səki bərpa olunmalıdır.
"Səki piyadalar üçündür, maşın saxlamaq üçün yox," – deyə o bildirib.
