Sumqayıt şəhərində kişi qısqanclıq zəminində yaranan mübahisə zamanı həyat yoldaşı Zümrüdə (adlar şərtidir – red.) xəsarət yetirib.
Demokrat.az-ın əldə etdiyi xəbərə görə, 1991-ci il təvəllüdlü Şamaxı rayon sakini Cəlil ailə-məişət və şəxsi münasibətlərin pozulması zəminində baş verən mübahisə zamanı Zümrüdün baş, burun, bel və kürək nahiyyələrinə yumruq ilə vurub.
Hadisəni törədən Cəlilin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Cəlil ona elan olunmuş ittiham üzrə özünü təqsirli bilib.
"2012-ci ildə Zümrüd ilə ailə həyatı qurmuşuq. 3 övladımız var. Məlum hadisə günü yaşadığım evə yollandım və həyat yoldaşımın əsəbi olduğunu gördüm. Mən Zümrüddən nə üçün əsəbi olduğunu soruşdum. O da mənə hansısa qadınla telefonla danışdığımı dedi. Zümrüdə həmin mesajların keçmişdən qaldığını dedim. Lakin o, sözlərimə inanmadı. Buna görə də mübahisəni davam etdirmədim. Həyat yoldaşım ünvanıma nalayiq ifadələr işlətdiyi üçün istəmədən də olsa əsəbi halda yumruqla onun burnuna və başına vurdum. Daha sonra əsəbim soyumadığı üçün Zümrüdü divanın üzərinə yıxdım və ona bir neçə yumruq zərbəsi vurdum. Bizim mübahisələrimiz qısqanclıq zəminində olub. Zümrüd məni müxtəlif vaxtlarda tanımadığım qadınlara qısqanıb", - deyə Cəlil bildirib.
İş üzrə zərərçəkmiş Zümrüdün sözlərinə görə, əri təxminən üç ildən çoxdur ki, ona xəyanət edir:
"Buna görə də aramızda dəfələrlə mübahisə yaranırdı. Sonuncu dəfə Cəlilin mənə xəyanət etdiyi qadının hamilə olduğunu öyrəndim. Buna görə də ona öz iradımı bildirdim. İraddan əsəbləşən Cəlil ilk öncə yumruq zərbəsi ilə əvvəlcə burnuma və başıma, daha sonra təpiklə qarnıma və belimə vurdu. Daha sonra saçımdan tutaraq sürüdü. Cəlil məni divanın üzərinə sürüdükdən sonra üz və müxtəlif nahiyələrimə vurmağa başladı. Məni buraxdıqdan sonra ayağa qalxa bilmədim və bir neçə dəqiqədən sonra burnumun qanadığını gördüm".
Sumqayıt Şəhər Məhkəməsində məlum olub ki, təqsirləndirilən şəxs zərərçəkənlə barışıq əldə edib. Bu səbəbdən zərərçəkən ərini bağışlayıb, ona qarşı şikayətini geri götürüb.
Məhkəmənin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxsin barəsində olan cinayət təqibinə xitam verilib və o, cinayət məsuliyyətindən azad edilib.
