"Şəhərimizdə həllini gözləyən bəzi vacib məsələlər qalmaqdadır. Onlardan biri məişət tullantılarının utilizasiyası və daşınması ilə bağlı problemdir. Hazırda 500 mindən çox əhalisi olan Sumqayıtda tullantıların həcmi ildən-ilə artır, mövcud poliqon isə bu yükü daşımağa çətinlik çəkir. Tullantıların yandırılması nəticəsində yaranan tüstü ətraf yaşayış məntəqələrində haqlı narazılıqlara səbəb olur.
Bu təkcə ekoloji deyil, eyni zamanda sosial məsələdir. Ona görə də təklif edirəm ki, Sumqayıtda tullantıların müasir utilizasiyası zavodu inşa olunsun. Belə bir müəssisənin yaradılması həm ekoloji tarazlığın qorunmasına həm də şəhərin yaşıl iqtisadiyyat və yaşıl şəhər konsepsiyasına tam uyğun olar".
Sumqayit24.az xəbər verir ki, belə bir təkliflə deputat Səbinə Salmanova parlamentin bugünkü iclasında büdcə müzakirələri zamanı çıxış edib.
O, həmçinin əlavə edib ki, Sumqayıtda bəzi sənaye müəssisələrinin tullantılarının Sumqayıt çaya, oradan isə Xəzər dənizinə axıdılması problemi hələ də tam həllini tapmayıb:
"ADSEA-nın bu il apardığı yoxlamaları da bu vəziyyəti təsdiqləyir. Kimyəvi tullantıların su və torpaq tərkibinə mənfi təsiri Xəzərin flora və faunasına zərər vurur, həmçinin sakinlərin dənizdən istifadəsinə məhdudlaşdırır.
Halbuki şəhərin strateji qəsəbəsində istiqamətində yerləşən su təmizləyici qurğu sutkada 200 min kubmetr suyu təmizləmək gücünə malikdir. Lakin bu potensial tam şəkildə istifadə olunmur. Hazırda 18 nöqtədən Xəzərə çirkab suların axıdılması müşahidə olunur və onların mövcud qurğuya birləşməsiylə böyük bir ekoloji riskin qarşısını almaq mümkündür.
Təklif edirəm ki, Sumqayıtda su təmizləyici sistemlərin bərpası və genişləndirilməsi istiqamətində təcili tədbirlər həyata keçirilsin. Bu həm dənizin ekoloji mühafizəsi, həm də şəhər əhalisinin sağlam yaşayış mühitinin qorunmasına xidmət edəcək.
