Sumqayıtın Xəzər bağları yaşayış massivində infrastruktur problemi sakinləri boğaza yığıb.
Sumqayit24.az-a daxil olan məlumata görə, vətəndaşlar illərdir səslərini kiməsə eşitdirə bilmirlər və ərazidəki infrastruktur problemi insanları bezdirməklə yanaşı, həyatı da iflic edib.
"Yollar bərbad vəziyyətdə olduğu üçün adi günlərdə belə hərəkət etmək mümkün deyil. Yağış yağan kimi küçələr gölməçəyə çevrilir, palçıqdan keçmək olmur. Bir sözlə, nə avtomobil, nə də piyadalar üçün normal hərəkət imkanı qalmayıb", - deyə sakinlərdən biri bildirib.
Bundan əlavə, küçə işıqları illərdir yanmır, axşam saatlarında ərazi qaranlığa qərq olur. Belə ki, insanlar evlərinə qaranlıqda, qorxa-qorxa qayıtmaq məcburiyyətində qalırlar.
Ən böyük narazılıq isə kanalizasiya xətlərinin hər yağışda daşmasıdır:
"Lüklar tez-tez dolur və küçələrə üfunət saçır. Pis qoxu, antisanitariya vəziyyəti dözülməz dərəcəyə çatır. Belə vəziyyət biabırçılıqdır".
Vətəndaşların sözlərinə görə, onlar bu problemlərlə bağlı dəfələrlə bələdiyyə və icra hakimiyyətinə müraciət etsələr də, heç bir ciddi tədbir görülməyib.
Yerli sakinlər aidiyyəti qurumlardan əraziyə baxış keçirilməsini və sadalanan problemlərin təcili şəkildə aradan qaldırılmasını tələb edirlər.
