Sumqayıtda piyadalar üçün təhlükə saçan yolda yerüstü keçid tikiləcək. Sumqayıt24 bu haqda 9 avqust tarixində Aayda.gov.az-a istinadən xəbər verir.
Söhbət Kimya Sənaye Parkının yaxınlığından keçən avtomobil yolundan gedir. İqtisadi zonaların inkişaf agentliyinin peşə təhsil mərkəzinin yüzlərlə tələbəsi, eyni zamanda Sənaye Parkında çalışan insanların istifadə etdiyi yolda hər həftə qəza olur. Ötən ay məhz bu yerdə bir gənci avtomobil vuraraq öldürmüşdür.
Azərbaycan Avtomobil Yolları Dövlət Agentliyinin (AAYDA) yaydığı məlumata görə, Hacı Zeynalabdin qəsəbəsi və Sumqayıt yolunun genişləndirilməsi işi icra olunandan sonra magistralın 3.8-ci kilometrində yerüstü piyada keçidi inşa olunacaq. Onun uzunluğu 30, eni isə 3.5 metr təşkil edəcək.
