Tanınmış sumqayıtlı aktrisa Zülfiyyə Qurbanova Sumqayıtdan Bakıya sərnişin daşıyan mikroavtobus sürücüsündən narazıdır.
Sumqayit24.az xəbər verir ki, o bu barədə sosial media hesabında paylaşım edib:
"Mən Sumqayıt şəhərində yaşayıram, artıq 22 ildən çoxdur hər gün Sumqayıt-Bakı yolunu gedib-gəlirəm.
Hər gün evin yaxınlığındakı dayanacaqdan mikroavtobuslara minib işə gedirəm. Bu gün də o günlərdən biri idi.
Mikroavtobusun (sprinter) biri gəldi və düz yanımda saxladı, mindim. Avtobusun üstündə "20 Yanvar" yazılmışdı. Bu, o deməkdir ki, "20 Yanvar"a sərnişin daşıyır. Yol getdikcə gördüm ki, sürücü musiqiyə ən yuxarı həddə qədər səs verib. Avtobusda oturan qızlar və oğlanlar ona qoşulub mədəniyyətsizcəsinə oxuyurlar, oxumurlar, böyürürlər.
Sənin şəxsi sərhədlərin mənim rahatlığımı pozduğu yerdə bitir. Qulağımda qulaqcıq Bakıya çatana qədər dözməyə çalışdım, amma dözüləsi deyildi. Onu da əlavə edim ki, maşında oturan sərnişinlər Sumqayıt şəhərində və Saray qəsəbəsində yaşayan tələbələr idi. Dözmədim, iradımı bildirdim. Elədiyinin düzgün olmadığını, bizi düşürəndən sonra nə istəyirlərsə, onu etsinlər deyə etiraz etdim. Qeyd edim ki, sürücü yanındakı qızlarla danışır, söhbətə başı qarışaraq, dəfələrlə maşını təhlükəli sürürdü. Ona irad bildirəndə sürücü "maşın mənimdir, nə istəyirəm edirəm. Siz mənim maşınıma minmisiz", dedi. Mən ona sizin şəxsi maşınınız o zaman olur ki, onu ictimai nəqliyyat kimi istifadə etmirsiniz deyə cavab verdim. O, mənə "mən maşında tələbələri daşıyıram, siz özünüz mindiniz dedi. Halbuki yalan deyir. Dayanacaqda saxlayıb adam yığdı. O yığılan adamlardan biri də mən idim.
Əgər yalnız tələbələrdən ibarət sərnişin yığırdısa, maşının üzərinə servis və ya sifariş yazmalı idi. Ya da ki, "20 Yanvar" sözünü götürməli idi. Mənə dedi ki, "hara istəyirsənsə, şikayət elə, əcəb edirəm, kefim bilər. İstəsəm sizi mənə irad bildirəndə maşından düşürərəm".
Tələbə adını daşıyanlar hər gün gedib gəldikləri sürücülərini mədəniyyətsizcəsinə müdafiə etdilər.
Bu məsələ ilə bağlı Nəqliyyat Agentliyinə və "102"yə şikayət edəcəm.
Maşını hansı səviyyədə sürdüyü ilə bağlı məndə video görüntü var. Görüntüyə sürücünün əlaqə nömrəsi də düşüb. Artıq sürücünü mədəniyyətdən kənar həmin tələbələr gəlib müdafiə edərlər".
