"45 il Sumqayıt Dram Teatrında çalışmışam. Son iş yerim Mingəçevir Dram Teatrı olub. Həm rejissor kimi tamaşalar hazırlayırdım, həm də aktyor kimi səhnəyə çıxırdım. Lakin hazırda işsizəm. 8 ay olacaq ki, bekaram. Bekarçılıq pis şeydir. Heç kəsə qismət olmasın. Mən pandemiyada belə bekar qalmırdım. Əlimə bel götürüb bağda iş görürdüm, nəsə əkib-biçirdim. Paytaxt teatrlarının öz aktyorları var. Gəlmə aktyor həmişə ögey kimi görünür. Tutaq ki, mən paytaxtdakı hansısa teatra getdim. Orada da mənim yaşda aktyorlar var. Onlar da fikirləşəcəklər ki, rejissor rolu niyə özününkünə vermir, gəlməyə verir? Söz-söhbət olacaq, dava düşəcək. Müdiriyyət də başını ağrıtmaq istəməyəcək. Onu da qınamıram. Oturub da sakit, niyə Valehdən ötrü başını ağrıtsın ki?".
Bunu Xalq artisti Valeh Kərimov moderator.az-a açıqlamasında deyib. O daha sonra Sumqayıt Dram teatrına qayıtmaq istədiyini də etiraf edib:
"Niyə də istəməyim axı?! Bu teatr mənim doğma iş yerim olub. İşləyərəm. 81 yaşım var, mənim də yaşıma görə rollar var da. İndi mən nə Fəxrəddin, nə Balaş, nə Romeo oynayan deyiləm ki! Qoca rollar da var. Əgər "Krali Lir" tamaşası hazırlayırsansa, onu yaşlı aktyor daha yaxşı oynaya bilər də. 65 yaşında aktyoru o halda işdən çıxarmaq olar ki, dili söz tutmur, səhnədə danışa bilmir, yaddaşını itirir və ona görə məşqlər gecikir. Gənc aktyorlar 15 günə rolun sözlərini əzbərləyirlərsə, bu 2 aya da əzbərləyə bilmir. Bu halda mən də razıyam ki, çıxım evdə oturum".
