Bu gün sumqayıtlı şəhidin anım günüdür.
Sumqayit24.az xəbər verir ki, şəhid Rauf Məhərrəm oğlu İbadov 4 may 1996-cı ildə Sumqayıt şəhərinin Saray qəsəbəsində anadan olub. 2002-2013-cü illərdə 2 saylı məktəbdə orta təhsil, 2013-2017-ci illərdə isə Azərbaycan Memarlıq və İnşaat Universitetində İnşaat Texnologiya fakültəsində ali təhsil alıb.
2020-ci il sentyabr ayının 21-də cəbhəyə yollanıb. Müharibə başladığı ilk gündən Füzuli, Cəbrayıl, Hadrut, Qubadlı cəbhələrində göstərdiyi şücaətinə görə Rauf manqa komandiri təyin olunub.
Döyüş meydanından yaralı şəhid əsgər yoldaşlarını öz çiynində daşıyan Rauf 23 oktyabr tarixində, Laçın Dəhlizi ərazisində mühasirəyə düşdükləri zaman üzbəüz atışma zamanı əlbəyaxa döyüşlə bir neçə düşməni məhv edərək qəhrəmancasına həlak olub. 24 yaşlı şəhid 30 oktyabr tarixində, Saray qəsəbəsindəki Şəhidlər Xiyabanında dəfn olunub.
Qeyd edək ki, Rauf İbadov həm də rəssam olub. Çəkdiyi rəsm əsərlərinin əksərriyəti vətənpərvərlik mövzusunu əhatə edib.
Prezident İlham Əliyevin Sərəncamlarına əsasən, göstərdiyi qəhramanlığa görə, "Vətən uğrunda", "Cəbrayılın azad olunmasına görə" və "Füzilinin azad olunmasına görə" medalları ilə təltif olunub.
