Sumqayıtda yataqxananın zirzəmisində 4 ildir ki antisanitar vəziyyət hökm sürür. Bina artıq qəzalı vəziyyətdədir. Sumqayıt24 bu haqda XəzərTV-yə istinadən xəbər verir.
Sözügedən problemlə 26-cı məhəllədə yerləşən və “uçuq bina” kimi tanınan ərazinin sakinləri qarşılaşıb. Belə ki, sözügedən yataqxananın zirzəmisində 1 metrə qədər kanalizasiya suları yığılıb. Həmçinin buraya müxtəlif növ tullantılar səpilib.
Özünü Qubadlı rayon İcra Hakimiyyətinin mənzil kommunal idarəsinin rəisi kimi təqdim edən şəxsin sözlərinə görə, antisanitar vəziyyət həmin binanın sakinləri tərəfindən yaradılır: “Adam yaşadığı evin döşəməsini deşir, kanalizasiya sularını buraxır zirzəmiyə. 3 gündür bizə müraciət olunub. Gəlmişik, düzəldirik. Mən özüm burada 15 il yaşamışam”.
Daha sonra, şəhər Sukanal İdarəsinin əməkdaşları əraziyə gəlib və yığılmış suyu xüsusi nasos vasitəsilə çəkiblər. Bildirilib ki, zirzəmiyə baxış keçiriləcək, problemin yaranma səbəbləri araşdırılacaq və qısa vaxt ərzində həll ediləcək.
