“Regional İnkişaf” İctimai Birliyi (RİİB) akademik Azad Mirzəcanzadə adına inkişaf proqramına start verib. Sumqayıt24 bu haqda 24 oktyabr tarixində xəbər verir.
Proqram paytaxt və regionları əhatə edəcək. O, yeni imkanları dəyərləndirməyi, aktual problemlərin yaradıcı həlli yollarını tapmağı bacaran, dayanıqlı gələcəyə töhfə verməyə çalışan, çevik, innovativ yanaşmalara sahib gənclərin üzə çıxarılması və onların inkişafına dəstək verilməsi məqsədi daşıyır.
Müraciətçilərin layihə ideyaları işçi qrupu tərəfindən qiymətləndiriləcək. Aktuallığı, reallığı, innovativliyi və yenilikçi ideyaları ilə seçilən müəlliflər 2-ci mərhələdə iştirak edə biləcəklər. Bu mərhələdə iştirakçılara layihələrin hazırlanması və təqdimatı istiqamətində peşəkar dəstək veriləcək, liderlik bacarıqlarının inkişafı üçün müxtəlif fəaliyyətlər təşkil olunacaq. Sonda qalib layihələrin icrası üçün vəsait ayrılacaq.
Proqrama qoşulmaq istəyənlər https://bitly.ws/VVKj linki vasitəsilə qeydiyyatdan keçməli, anket formasını doldurmalıdırlar.
Yaşı 18-35 arası olan hər bir Azərbaycan vətəndaşı müraciət edə bilər. İdeyaların Azərbaycan dili ilə yanaşı, ingilis dilində də təqdim olunması mümkündür. Qeydiyyat oktyabrın 25-dək davam edəcək.
Qeyd edək ki, tədbir 25 oktyabr saat 11:00-da Sumqayıt Dövlət Universitetində keçiriləcək.
Əlavə məlumatı RİİB-nin 150 çağrı mərkəzindən almaq olar.
