“SOCAR Polymer” yay təcrübə proqramına ərizə qəbulu aparır. Sumqayıt24 bu haqda 28 mart tarixində xəbər verir.
Tələbələr Sumqayıt şəhərində yerləşən Polipropilen və Yüksəksıxlıqlı Polietilen zavodlarının istehsalat sahəsində (və ya ofisində) təcrübə keçəcəklər. 8 aylıq təcrübə zamanı onlar şirkəti yaxından tanımaq, neft-kimya sənayesində tələb olunan ən yeni bilik və bacarıqlara yiyələnmək, şirkətin həyata keçirdiyi layihələrdə iştirak etmək imkanı əldə edəcəklər.
Təcrübəçilər tanışlıqdan sonra real tapşırıqlar üzərində işləyən heyətə qoşulacaqlar. Onlar üçün müxtəlif təlimlər təşkil olunacaq. Həmçinin mütəxəssislə görüşə, peşəkar rəy ala biləcəklər.
Bu proqram insan resursları, materialların idarə olunması, texnologiya, laboratoriya, hüquq, informasiya texnologiyaları, maliyyə, sənədlərin idarə olunması, SƏTƏM, texniki dəstəyin planlanması, mühəndislik, texniki dəstək, təchizat sahələri üzrə bilik, bacarıq və təcrübələrini artırmaq istəyən tələbələr üçün nəzərdə tutulub.
Yay təcrübəsi proqramına qatılmaq üçün www.socarpolymer.az saytının “Karyera > İstehsalat Praktikası Proqramı” bölməsində yerləşdirilmiş ərizə formasını doldurmaq lazımdır. Namizədlər uyğun bildikləri bir və ya iki təcrübə sahəsi üzrə proqrama qatılmaq üçün ərizə verə bilərlər.
Yüksək təhsil göstəricilərinə malik olan və ingilis dilini yaxşı bilənlər, bakalavr pilləsinin son kursunda və ya magistraturada təhsil alan tələbələr müsabiqədə iştirak etməyə dəvət olunurlar.
Müraciət üçün son tarix: 28 aprel.
