Gənc sumqayıtlı idmançı Namiq Abaslının doğum günüdür.
Sumqayıt24 xəbər verir ki, Namiq Zülfüqar oğlu Abaslı 12 sentyabr 1997-ci ildə anadan olub. Uşaq yaşlarından cüdo ilə məşğul olmağa başlayıb. 2018-ci ildə Portuqaliyada baş tutan Dünya Çempionatını 7-ci pillədə başa vurub, komanda turnirində isə bürünc medal qazanıb.
Namiq 2019-cu ilin may ayında Qran-Pridə, həmin ilin iyul ayında isə İtaliyada baş tutan Avropa Çempionatında bürünc medala sahib olub. 2021-ci ilin may ayında isə o, Qran-Pridə birinci yeri tutub.
Sumqayıtlımız Yaponiyada baş tutan XVI Yay Paralimpiya Oyunlarında da mübarizə aparıb. O, 1/4 final mərhələsi çərçivəsində ispan Serxio İbanezə məğlub olsa da, təsəlliverici qrupda rəqiblərini yenib və bürünc medal uğrunda görüşə vəsiqə qazanıb.
Həlledici görüşdə onun rəqibi 2012-ci il London Paralimpiadasının qalibi olan Ukrayna təmsilçisi David Xorava idi. Rəqibini vaza-ari ilə məğlub edən Abaslı bürünc medala sahib çıxıb.
Həmçinin cüdoçumuz 2023-cü ildə Misir Qran-Prisinin də çempionu olub.
Azərbaycan Prezidenti İlham Əliyevin Sərəncamına əsasən, XVI Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Namiq Zülfüqar oğlu Abaslı 3-cü dərəcəli "Vətənə xidmətə görə" ordeni ilə təltif olunub.
Əldə etdiyimiz məlumata görə, hazırda Namiq qarşıdan gələn Dünya və Avropa çempionatlarına hazırlaşır.
