Bu gün paracüdo üzrə Sumqayıt idmançısı Vüqar Şirinlinin doğum günüdür.
Vüqar Tofiq oğlu Şirinli 1992-ci ildə anadan olub.
Cüdoçu 2016-cı ildə Kazan şəhərində (Rusiya) baş tutan Avropa Çempionatında mübarizə aparıb və bürünc medala sahib olub. 2018-ci ildə gözündə olan problemlərə görə Vüqar para-cüdo üzrə turnirlərdə mübarizə aparmağa başlayıb.
Şirinli 2018-ci ildə Portuqaliyada baş tutan Dünya Çempionatını bürünc medalla başa vurub. Komanda turnirində də o, bürünc medalına sahib olub.
2019-cu ilin may ayında Qran-Pridə qalib olan Vüqar, 2021-ci ilin may ayında həmin turnirin bürünc medalına sahib olub və il ərzində beynəlxalq turnirlərdə topladığı reytinq xalları hesabına Paralimpiya Oyunlarına vəsiqə qazanıb.
2021-ci ilin avqust ayında Şirinli Yaponiyada keçirilən XVI Yay Paralimpiya Oyunlarında mübarizə aparıb. O, finalda görüşün sonuna 20 saniyə qalmış rəqibi Qazaxıstan nümayəndəsi Anuar Sarıyevı ipponla qalib gəlib və XVI Yay Paralimpiya Oyunlarının qalibi olub.
Vüqar görüşdən sonrakı müsahibəsində bunları bildirib: "çempion olduğum üçün çox şadam. Bu mənim məqsədim idi. Yaponiyada bayrağımızı dalğalandıra bildiyim üçün şadam".
Prezident İlham Əliyevin müvafiq Sərəncamına əsasən, XVI Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Vüqar Şirinli 1-ci dərəcəli "Vətənə xidmətə görə" ordeni ilə təltif edilib.
