Sumqayıt uğurlu idmançıları ilə tanınır. Bu barədə 31 iyul tarixində Sumqayıt24 xəbər verir.
Şəhərimizdə əksər valideynlər övladlarını kiçik yaşlarından idmana yazdırırlar. Məqsəd onları güclü, uğurlu və sağlam ruhda böyütməkdir. Sumqayıtın karate, cüdo, güləş, boks, sambo və şahmat məktəblərinin yetirmələri dünyaya saysız-hesabsız nailiyyətləri ilə səs salıblar.
“Gənclik şəhəri”nin tanınmış idmançıları barədə məlumatlar:
“Qara brilyant”
Rafael Ağayev karate üzrə 5 qat dünya çempionudur. O, həmçinin olimpiada ikincisi və 11 dəfə Avropa birincisi də olub. “Qara brilyant” nailiyyətlərinə görə, 54 ilin ən yaxşı karateçisi seçilib və Ginnesin Rekordlar Kitabına düşüb.
Rəcəblilər ailəsi
Onlar ölkəmizi beynəlxalq arenada sambo və cüdo üzrə layiqincə təmsil edirlər.
“Şöhrət” ordenli və “Tərəqqi” medallı Əhməddin Rəcəbli həm tanınmış idmançı, həm də Əməkdar məşqçidir. Əhməddinin kiçik qardaşlarından Fərhad Rəcəbli də gənclik illərindən çox sayda mükafatlar qazanıb. 64 yaşlı veteran idmançı 11 qat dünya və 10 qat Avropa çempionudur. Həmçinin Məmməd və mərhum Əhəd Rəcəblilər də sambo və cüdo üzrə Azərbaycan birincisi olublar.
Əhməddin Rəcəblinin oğlu Elxan Dünya kuboku və Hərbçilər arasında dünya çempionatının qızıl mükafatçısıdır. Onun digər övladı Zaur Rəcəbli isə Əməkdar məşqçidir.
Hazırda məşhur ailənin gənc üzvü Ömər Rəcəbli böyüklərinin uğurlu yolu ilə gedir.
İlham Zəkiyev
Azərbaycan paracüdoçusu, ikiqat Paralimpiya Oyunları çempionu, ikiqat dünya çempionu, səkkizqat Avropa çempionu, 2015 Avropa Oyunları çempionu, Azərbaycanın Əməkdar İdman Ustası, Əməkdar məşqçi, 7-ci dan sahibi, Qarabağ müharibəsi əlili və qazisi.
Zəkiyev "Şöhrət" ordeni (2 dəfə) və "Tərəqqi" medalı ilə mükafatlandırılıb. Paralimpiya Oyunlarında dəfələrlə Azərbaycanın bayraqdarı olub.
O, 1999-cu ildə cəbhə bölgəsində snayperlə başından vurulub. Bundan sonra görmə qabiliyyətini itirmiş və cüdo ilə ciddi məşğul olmağa başlamışdır.
“Pəhləvanlar”ımız
Sumqayıtın güləş məktəbi yetərincə çempionlar yetişdirib. Onların arasında İslam Abbasov, Murad Məmmədov və Ülvü Qənizadəni xüsusilə qeyd etmək olar. Pəhləvənlarımız yerli və beynəlxalq yarışlarda çoxlu qələbələr qazanıblar.
Elvin Məmişzadə
Azərbaycanı təmsil edən boksçu 2015-ci il Dünya Çempionatının və Avropa Oyunlarının qızıl medalçısıdır. Prezident İlham Əliyev Elvini "Şöhrət" ordeninə layiq görüb.
Beynəlxalq qrosmeysterlər
Məmmədyarovlar ailəsi şahmat dünyasına üç qrosmeyster bəxş edib. Şəhriyar Məmmədyarov, bacıları Zeynəb və Türkan həm şəxsi, həm də millinin heyətində gözəçarpan nailiyyətlərə sahibləniblər.
Sumqayıtlı Vasif Durarbəyli də çox sayda turnirlər qazanıb. O, hazırda ABŞ-də yaşayır və təzəlikcə orada çempionluğa sevinib.
Onu da qeyd edək ki, illər keçdikcə şəhərimizdə uşaq, gənc və xanım idmançıların sayı sürətlə artır.
