"Sumqayıt" - "Zirə" oyununda Əsasnamənin tələbləri pozulduğuna görə "Kimyaçılar" 500 manat cərimə edilib.
Əsasnamənin pozulması dedikdə söhbət ev sahibi komandanın öz futbolçuları ilə yanaşı, rəqib klubun oyunçularının və hakimlərin də yuyunması üçün isti su ilə təmin etməməsindən gedir. Bu mövsüm artıq üçüncü dəfədir klub eyni səbəbdən cəzalanır.
Xəbər verdiyimiz kimi, uzun müddətdir yığılan borc səbəbindən "Azəriqaz" idman qurğusuna qazın verilməsini dayandırıb. Söhbət 100 min manatlıq borcdan gedir. Buna görə arenada isti suyun verilməsi müşkülə çevrilib.
Məsələ ilə bağlı açıqlama verən AFFA-nın mətbuat xidmətinin rəhbəri Elnur Məmmədli klubu günahkar görüb. Federasiya rəsmisi "Sumqayıt"ın adıçəkilən arenanı 1 illik icarəyə götürdüyünü və bu səbəbdən yığılan borcun da onlar tərəfindən ödənilməli olduğunu iddia edib.
Bəs əsl həqiqət necədir?
“Sportinfo”nun sorğusuna cavab olaraq "Sumqayıt"ın mətbuat xidmətinin rəhbəri Zaur Xudiyev bunları dedi:
"Elnur Məmmədlinin açıqlamalarını mən də təəccüblə oxudum. Təcrübəli həmkarımın ona, təmsil etdiyi quruma aidiyyəti olmayan məsələ haqqında dedikləri məndə böyük təəssüf hissi yaratdı. Detallarını bilmədiyi bir müqavilə haqqında belə əmin danışmaq, fikir bildirmək və hökm vermək onun səlahiyyətlərini aşır.
Bildirmək istəyirəm ki, Elnur Məmmədlinin verdiyi açıqlamada səsləndirdiyi fikirlər tamamilə əsassızdır.
Borc biz hələ oyunlarımızı bu arenada keçirməmişdən öncədən mövcud olub. Biz ayda cəmi 2 dəfə oyun keçiririk və 2 oyunla 100 min manatdan çox borc yığıla bilməz. Özümüz də əziyyət çəkirik. Hər dəfə AFFA İntizam Komitəsi bizi cərimələyir. Klub olaraq bildiririk ki, həmin borcu stadionu tikən orqan – Sumqayıt Şəhər İcra Hakimiyyəti ödəməlidir. Yəni klub tərəfindən hansısa borc yoxdur. Sözügedən borcun "Sumqayıt" Futbol Klubuna heç bir aidiyyəti yoxdur.
AFFA rəsmisi isə sadəcə yazılan cərimə barəsində danışmaq haqqına sahibidir ki, digər bütün hallarda məqsədini aşmış olur".
