“Sumqayıt”ın mətbuat katibi Mehdi Hüseynzadə adına stadionunun son durumundan danışıb. Sumqayıt24 bu haqda 28 iyun tarixində Report.az-a istinadən xəbər verir.
Zaur Xudiyev bildirib ki, UEFA çatışmazlıqları aradan qaldırılmasına konkret vaxt qoymayıb. Klub özü öhdəlik götürüb:
“Tövsiyələrə uyğun işlər görülür. Oyun gününə qədər stadion tam hazır olmalıdır. Hazırda görülən işlər turniketlərin quraşdırılması, rəqib azarkeşlər üçün sektorun ayrılması və kənarlardan məhdudlaşdırılmasıdır. Çəkiliş üçün meydanın əks-tərəfindən əlavə platforma da quraşdırılmalıdır. Bayraq dirəkləri və bayraqlarla bağlı yenilik olacaq. Əlillər üçün tribunanın hazırlanması da nəzərdə tutulub. Ciddi problemlər yoxdur. İşlər görüldükcə UEFA rəsmilərinə məlumat verilir. İnşallah, öhdəliyimizi oyun gününə qədər yerinə yetirəcəyik”.
Z. Xudiyev bilet satışı ilə bağlı xüsusi yeniliyin olmayacağını əlavə edib:
“Konfrans Liqasının adı elə ən böyük layihədir. Biletlər normal qaydada satışa çıxarılacaq. Yəqin ki, həmişəki kimi onlayn və kassalardan satış olacaq”.
Xatırladaq ki, “Sumqayıt” UEFA Konfrans Liqasının II təsnifat mərhələsində “Fehervar"la qarşılaşacaq. İlk matç iyulun 25-də Sumqayıtda, cavab qarşılaşması isə 31-də Macarıstanda keçiriləcək.
