Kadetlərin Avropa birinciliyində mükafat qazanan boksçuların oxuduqları məktəblərdə görüş keçirilib.
Sumqayıt24 xəbər verir ki, Bilik Günündə təşkil olunan tədbir Sumqayıt şəhəri Polad Həşimov adına 28 saylı və Sumqayıt şəhəri 26 saylı məktəbdə baş tutub. Uğur qazanan boksçulara Azərbaycan Boks Federasiyası (ABF) tərəfindən hədiyyələr verilib. Həmçinin məktəb direktorlarına ABF-in təşkil etdiyi yarışlarda idmançılara yaratdığı şəraitə görə təşəkkürnamə təqdim edilib.
Qeyd edək ki, Bosniya və Herseqovinanın Banya Luka şəhərində kadetlər (məktəblilər) arasında keçirilən Avropa birinciliyində Azərbaycan millisi 9 medal qazanıb. Yığmamızın heyətində Aysel Fərəcova (40 kq), Cəmilə Muradlı (48 kq), Səma Abbasova (60 kq) və Nurlan Müseyibli (60 kq) ikinci yeri tutublar. Kəmalə Həsənova (51 kq), Şükar Əliyev (63 kq), Mehran Rəsulov (75 kq), Yusif Ağakişiyev (80 kq) və Uğur Həsənov (90 kq) isə yarışda bürünc medal qazanıblar.
