UEFA-nın stadion inspektoru Sumqayıtda olub. Sumqayıt24 bu haqda 24 aprel tarixində xəbər verir.
İnspektor Neboyşa İvkoviç Mehdi Hüseynzadə adına stadiona baxış keçirib, müəyyən tövsiyələr verib və nüansları qeyd edib.
"Sumqayıt" klubunun mətbuat xidmətinin rəhbəri Zaur Xudiyev arena üçün 4-cü kateqoriya almaq istədiklərini söyləyib:
"Buna görə müəyyən düzəlişlər lazımdır. İndiki halda stadion Premyer Liqaya hazırdırsa, həm də avrokubokların ilkin mərhələ matçlarını qəbul edə bilər".
O, UEFA rəsmisinin toxunduğu məsələlərdən söz açıb:
"Premyer Liqa oyunu üçün yayımçı şirkətin avtomobillərinin siqnal aldığı yer fərqlidir. Avrokuboklarda avtomobilin dayanması üçün başqa yer lazım olacaq. Bundan əlavə, turniketlər quraşdırılmalıdır. Hazırda biletləri yoxlayanda mobil skanerlərdən istifadə edirik. UEFA turnirlərində turniketlər olmalıdır. Təhlükəsizlik kameraları ilə bağlı müəyyən tövsiyələr aldıq. İşıqlandırma sistemi onu qane etsə də, avrokuboklarda projektorların bir hissəsi yan tərəflərdən qapıların arxasına doğru çəkilməlidir. Medianın iş otağı üçün müəyyən tövsiyələr verildi".
