"Sumqayıt" klubunun yaponiyalı futbolçusu Masaki Murata Qol.az-a müsahibə verib.
Gənc yarımmüdafiəçi "Bu, sizin "Sumqayıt"a ikinci gəlişinizdir. Saşa İliçin komandası əvvəlki kollektivdən nə ilə fərqlənir?" kimi bir sıra suallara cavab verib.
Onun cavabını və digər sualları təqdim edirik:
- Hazırda yenidən "Sumqayıt"da olduğum üçün xoşbəxtəm. İşimizdən zövq alırıq. Hamı birlikdə komandanın uğuru üçün çalışır. Bir sözlə, yaxşı kollektivimiz var.
- Hazırkı duruma görə "Sumqayıt"ın avrokubok şansını necə qiymətləndirirsiniz?
- Turnir cədvəlində vəziyyətimiz yaxşıdır. Lakin mövsümün sonuna hələ çox var. Məqsədimiz oyundan oyuna irəli getmək və daha çox xal qazanmaqdır.
- Azərbaycanda sizdən başqa daha bir yaponiyalı futbolçu – Ryonosuke Ohori də çıxış edir. Onunla tanışlığınız var?
- Bəli, Ohori ilə əlaqəmiz var. Lakin hazırda "Kəpəz"də çıxış etdiyi üçün o, Bakıda yaşamır. Bununla belə, imkan olanda mütləq görüşürük, kafedə otururuq, futboldan danışırıq. Bir sözlə, münasibətimiz yaxşıdır.
- Kafedən söz düşmüşkən, Azərbaycan mətbəxi ilə aranız necədir, sevdiyiniz milli yemək hansıdır?
- Azərbaycan mətbəxi ilə aram yaxşıdır. Ən çox sevdiyim isə qutabdır (gülür). Bəzən məşqlərdən sonra futbolçularla birlikdə qutab yeməyə gedirik. Şirniyyatları da sevirəm.
