Sumqayıtda gənc oğlan bıçaqlanıb. Sumqayıt24 bu haqda 3 avqust tarixində xəbər verir.
Hadisə Nizami küçəsində, 1 nömrəli məktəbin qarşısında baş verib. Belə ki, 24 yaşlı Pərviz Bağırov tanışı, 19 yaşlı Kamran Qasımovla mübahisə edib. Nəticədə sonuncu Pərvizə 4 bıçaq zərbəsi vurub.
Əraziyə polis əməkdaşları və təcili tibbi yardım briqadası cəlb olunublar. Yaralı xəstəxanaya çatdırılıb. Kamran Qasımov isə saxlanılıb.
Sumqayıt Tibb Mərkəzindən verilən məlumata görə, ona döş qəfəsinin səthinin kəsilmiş-deşilmiş yarası diaqnozu qoyulub. Cərrahi əməliyyatdan sonra yaralı reanimasiya şöbəsinə yerləşdirilib. Vəziyyəti orta ağırdır.
