Sumqayıtda sürücünü şantaj edən 40 yaşlı Nübar Quliyeva (şərti) cinayət məsuliyyətinə cəlb edilib. Sumqayıt24 bu haqda 17 fevral tarixində Oxu.az-a istinadən xəbər verir.
Sumqayıt Şəhər Məhkəməsində barəsində Cinayət Məcəlləsinin 182.1-ci (Hədə-qorxu ilə tələb etmə) maddəsi ilə iş açılmış qadına hökm oxunub.
Araşdırmalar zamanı məlum olub ki, N. Quliyeva 19 oktyabr 2023-cü il tarixində 7 saylı avtobusa minib. Sürücü Qurban Aslanov (şərti) onun yanında dayanan Nübarla tanış olmaq istəyib. Bunun üçün o, nömrəsini telefonunun ekranına yazaraq nümayiş etdirib. Nübar Quliyeva isə sürücünün ona nömrə vermək istəməsini videoya çəkib.
Daha sonra qadın çəkdiyi videonu sosial şəbəkədə paylaşıb və bir neçə sayta göndərib. O, Qurbana yazaraq dövlət qurumlarına şikayət etdiyini bildirib və kişini söyüb. N. Quliyeva əlavə olaraq sürücünün WhatsApp profilindən övladlarının şəkillərini götürüb, onların üzərinə təhqiramiz sözlər yazıb.
Bundan sonra Qurban ondan videonu silməsini xahiş edib. Həmçinin bir neçə digər şəxs də görüntüləri görərək Nübardan yaydığı videonu silməsini tələb ediblər. Lakin o, Qurbanın 500 manat pul verməsini, əks təqdirdə onu biabır etməyə davam edəcəyini deyib.
Polisə edilən müraciətdən sonra Nübar Quliyeva barəsində cinayət işi başlanılıb. İtintaq müddəti üçün polisin nəzarəti altına vermə qətimkan tədbiri seçilib.
Məhkəmənin 9 fevral tarixli hökmü ilə qadın 3 il müddətinə azadlıqdan məhrum olunub. Lakin onun cəzası 2 il sınaq müddəti təyin olunmaqla şərti hesab edilib.
