Adam oğurluğunda təqsirləndirilən dəstənin üzvləri azadlıqdan məhrum ediliblər. Onların arasında Sumqayıt sakinləri olan Şaiq Hüseynov və Fəqan Eminoğlu da var. Bu haqda Trend-ə istinadən xəbər veririk.
Belə ki, Elçin Quliyev, Vasif Allahverdiyev, Niyaməddin Kazımlı və iki Sumqayıt sakini Bakıda Aygün Abbasova adlı şəxsin sifarişi ilə Bakı sakini Hüseyn Əsgərovu məcburi avtomobilə əyləşdirərək sifarişçinin Pirşağı qəsəbəsində yerləşən bağ evinə aparıblar.
Məlumata görə, qaçırılan şəxsin Abbasovaya 25 min manat borcu var idi. Lakin dəstə üzvləri bağ evində onu döyərək 30 min manat ödəməsini bildiriblər. Qeyd edək ki, alınan pulun müqabilində Aygün həmin şəxslərə 10 min manat verəcəyini vəd etmişdir.
Polis tərəfindən keçirilən əməliyyat zamanı həmin vətəndaşlar saxlanılıb. Məhkəmənin qərarı ilə Elçin Quliyev 11 il, Vasif Allahverdiyev 10 il, Niyaməddin Kazımlı, Şaiq Hüseynov və Fəqan Eminoğlu 8 il 6 ay azadlıqdan məhrum ediliblər. Sifarişçi olan Aygün Abbasovaya isə 5 il həbs cəzası təyin edilib. Onun cəzası övladının 14 yaşı tamam olandan sonra başlayacaq.
Cinayət işi üzrə təqsirləndirilən daha bir şəxs - Fərəh Rəsulovaya isə sınaq müddəti seçilməklə şərti cəza verilib.
Qeyd edək ki, dəstə üzvləri arasında idmançılar, dünya və Avropa çempionatları mükafatçıları da var.
