Sumqayıtda naməlum şəxs bir nəfərin təqaüd kartından pulunu oğurlayıb. Sumqayıt24 bu haqda 13 oktyabr tarixində Daxili İşlər Nazirliyinə (DİN) istinadən xəbər verir.
Zərərçəkən şəxs Sumqayıt Şəhər Polis İdarəsinə bildirib ki, bankomatın qarşısında kartından pul çıxarmaqda ona köməklik etməsi üçün tanımadığı şəxsə müraciət edib. Həmin şəxs kartı bankomata daxil edərək yalandan hesabda pul olmadığını bildirib. Kart sahibi oradan uzaqlaşdıqda isə bankomatdan çıxan pulu götürüb.
Polis əməkdaşlarının keçirdikləri əməliyyat nəticəsində şübhəli qismində Rövşən Xələfov saxlanılıb. O, bankomatların qarşısında dayanaraq, əsasən, ahılların təqaüd kartlarından pullarını oğurladığını etiraf edib.
Araşdırmalar aparılır. R. Xələfovun Sumqayıt, eləcə də digər ərazilərdə analoji cinayətlər etdiyi istisna olunmur. Onun qanunsuz əməllərindən zərər çəkənlər varsa, polisə məlumat verə bilərlər.
