“Mən özümü hadisədə təqsirli bilmirəm. İçki içdiyim üçün deyindi, odun parçasını başına atdım”.
Shimal.News-un əldə etdiyi məlumata görə, bu sözləri Sumqayıt Ağır Cinayətlər Məhkəməsində 85 yaşlı anasını öldürməkdə təqsirləndirilən Zülfüqar İsmixanov deyib.
Belə ki, 1974-cü il tarixdə Quba rayonu, Bağbanlı kəndində doğulmuş Zülfüqar İsmixanov anası ilə yaşadığı evə gələrək spirtli içki qəbul edib. Spirtli içki qəbul etdiyi üçün ona irad bildirən anasına əsəbiləşərək yaşlı qadını öldürmək qərarına gəlib. Yataq otağında olan odun parçasını götürərək 1938-ci il təvəllüdlü anası Zöhrə İsmixanovanın baş və bədəninin müxtəlif nahiyələrinə çoxsaylı zərbələr endirib. Nəticədə yaşlı qadın aldığı xəsarətlərdən ölüb.
Təqsirləndirilən şəxsə qarşı Cinayət Məcəlləsinin 120.2.4 və 120.2.9-cu (xüsusi amansızlıqla qəsdən adam öldürmə) maddəsi ilə cinayət işi açılıb. Məhkəmə istintaqına Sumqayıt Ağır Cinayətlər Məhkəməsində hakim Fəhmin Hümbətovanın sədrliyi ilə baxılıb.
Məhkəmə istintaqı zamanı təqsirləndirilən Zülfüqar İsmixanova ifadə vermək üçün şərait yaradılıb. O, törətdiyi əməldə özünü təqsirli bilməyib. İfadəsində deyir:
“Hadisə baş verdiyi gün bir qədər spirtli içki qəbul etmişdim. Yoldaşımla uşaqlar qonşuda idi. Anamın yüksək qan təzyiqi var. Buna görə tez-tez yıxılır. Həmin gün də onun halı pisləşdi. Pilləkənlərdən aşağı yıxıldı. Dərhal ayağa qalxıb anamın üzünə su vurdum, onu xəstəxanaya çatdırmağa çalışdım. Anamı öldürməmişəm”.
Onun məhkəməyədək icraat zamanı verdiyi ifadəsi zalda elan olunub. İstintaq zamanı verdiyi ifadədə özünü təqsirli bilib, hadisəni törətdiyini qəbul edib:
“Mən birinci mərtəbədə spirtli içki qəbul edirdim. Anam da ikinci mərtəbədə idi. Anam spirtli içki içdiyimi görüb narazılıq etdi. Daha sonra öz otağına qalxdı. Otaqdan çıxsa da, narazılığını davam etdirirdi. Buna görə əsəbiləşdim. Anamın otağına qalxdım. Onun otağında odunlar var idi. Anam deyindiyi üçün odunu onun başına atdım, sonra isə dəfələrlə başına vurdum. Baş vermiş hadisədə özümü günahkar bilirəm və peşmançılıq hissi keçirirəm”.
Məhkəmədə şahidlər və zərərçəkmiş tərəflər ifadə verib. Verilən ifadələr və aparılan araşdırmalarla Zülfüqar İsmixanov cinayətdə təqsirli bilinib.
Sonda məhkəmənin yekun qərarı ilə Zülfüqar İsmixanov 14 il 6 ay müddətində azadlıqdan məhrum edilib. O, azadlıqdan məhrumetmə cəzasını ciddi rejimli cəzaçəkmə müəssisəsində çəkəcək.
Fidan İlqar
