Anasını öldürən şəxs ifadə verib. Sumqayıt24 bu haqda 24 fevral tarixində Qafqazinfo.az-a istinadən xəbər verir.
Ötən il Xırdalanda 1974-cü il təvəllüdlü anası Mehriban Hüseynzadəni xüsusi amansızlıqla qətlə yetirən 24 yaşlı Orxan Hüseynzadənin məhkəməsi yekunlaşıb. Sumqayıt Ağır Cinayətlər Məhkəməsinin hökmünə əsasən, Orxan 18 il müddətinə həbs olunub.
Təqsirləndirilən şəxs ifadəsində bildirib ki, qətlin səbəbi anasının atasına xəyanət etməsindən şübhələnməsi olub. Orxan buna dair heç bir sübutunun olmadığını etiraf edib. O, evdə qadınlar üçün nəzərdə tutulan məhlul tapdığına görə bu qənaətə gəlib.
Anasına neçə bıçaq zərbəsi vurduğunu xatırlamadığını bildirən Hüseynzadə valideynini balta ilə hissələrə bölüb. O, meyiti zibilliyə atmaq və bu üsulla cinayəti gizlətmək istəyib.
Hadisə günü Orxanın atası işdə, bacısı isə ad günündə olub. Törədilən cinayəti isə qonşular aşkarlayaraq, hüquq-mühafizə orqanlarına məlumat veriblər.
Qeyd edək ki, Mehriban Hüseynzadə Mehdiabad qəsəbəsindəki uşaq musiqi məktəbində piano müəllimi olub. Onun həyat yoldaşı Aslan Hüseynzadə ifadəsində oğlunun şübhələrinin tam əsassız olduğunu bildirib. Kişinin sözlərinə görə, arvadı ona heç vaxt xəyanət etməyib, çox saf, sakittəbiətli və namuslu qadın, öz övladlarına həmişə yaxşı ana olub.
Orxan isə narkoman olub. Bir müddət Narkoloji Mərkəzdə müalicə alsa da, bunu yarımçıq dayandırıb.
Orxanın bacısı məhkəmədə qardaşını bağışlamadığını, ona ən ağır cəzanın verilməsini istəyib.
Onu da əlavə edək ki, O. Hüseynzadənin atası da baldızını bıçaqladığına görə bir neçə il həbs həyatı yaşayıb.
