Sumqayıt Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Qalib Qədirovun (soyadı şərti) istintaqı başa çatıb.
Pravda.az-ın məlumatına görə, hakim Hafiz Əliyevin sədrliyi ilə keçirilən prosesdə hökm oxunub. Nəticədə ona şərti cəza verilib və məhkəmə zalından azadlığa buraxılıb.
İttihama görə, hadisə 24 iyun 2024-cü ildə Quba şəhəri, Arif Hüseynzadə küçəsində qeydə alınıb.
Belə ki, Qalib Qədirov yaşadığı evin qarşısında uzun müddətdir ədavəti olan qonşusu, zərərçəkmiş Rəvan Həsənovla (soyadı şərti) mübahisə edib. Mübahisəyə səbəb isə zərərçəkmişin onu nalayiq ifadələrlə təhqir etməsi olub. Bu zaman təqsirləndirilən şəxs yaşadığı evdən ov bıçağını götürərək yenidən küçəyə çıxıb və Rəvanın qarnına zərbə endirib.
Saxlanılan Qalib Qədirov barəsində ev dustaqlığı qətimkan tədbiri seçilib.
O, məhkəmədə elan olunmuş ittiham üzrə özünü təqsirli bilərək ifadəsində göstərib ki, hadisədən əvvəl anası rəhmətə gedib. Anasının birinci cüməsində fikirini dağıtmaq üçün içki içib. Qonşusu olan Rəvan ona niyə içdiyini soruşub. O da "sənə nə var, niyə içirəm?" deyib. Bundan sonra davaları düşüb və nəticədə onu bıçaqlayıb.
