Sumqayıtda kişi arvadına xəsarət yetirib. Bu haqda 12 may tarixində Sumqayıt24 Demokrat.az-a istinadən məlumat verir.
30 yaşlı Pərviz ailə münaqişəsi zəminində yaranan mübahisə zamanı Zəminəyə (adlar şərti göstərilib – red.) xəsarət yetirib. Hadisəni törədən Pərvizin barəsində Cinayət Məcəlləsinin “qəsdən sağlamlığa xəsarət yetirmə” maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Pərviz ona elan olunmuş ittiham üzrə özünü təqsirli bilib.
O bildirib ki, 2019-cu ildə Zəminə ilə ailə həyatı qurub, həmin nikahdan 2020-ci il təvəllüdlü Aydın adında bir övladları var: “Evləndiyimiz gündən Sumqayıt şəhəri, Ceyranbatan bağları massivi ərazisində yerləşən evdə yaşamışıq. Lakin hazırda Binəqədi rayonunda yaşayırıq. Həyat yoldaşımla bəzən münaqişələrimiz olub. Xırdalan şəhərində kolbasa sexində işləyirəm. Hadisədən 2-3 gün öncə Zəminə Binəqədi rayonu ərazisində yaşayan anasıgilə getdi. Bir gün sonra öz yaşadığımız evə qayıtdı. Həmin gün saat 14:00-da evə gəldim. Anasıgildə qaldığına görə Zəminə ilə mübahisə etməyə başladım. Mübahisə zamanı şillə ilə Zəminənin gözünə vurdum. Sonra Zəminə hamam otağına gedib üzünün və burnunun qanını yuyaraq təmizlədi. Ertəsi gün işdə olduğum vaxt Zəminə əmisinin həyat yoldaşı ilə Binəqədidə yaşayan anasıgilə getdi və sonra bu barədə polisə şikayət verdi”.
İşə Sumqayıt Şəhər Məhkəməsində baxılıb. Məhkəmə təqsirləndirilən şəxsin zərərçəkmişlə barışdığını, zərərçəkmiş şəxsin ondan şikayətçi olmadığını nəzərə alıb. Bu səbəbdən Pərvizin barəsində olan cinayət təqibinə xitam verilib. O, cinayət məsuliyyətindən azad edilib.
