Arvadını və körpəsini amansızlıqla öldürməkdə ittiham olunan Fərid Hüseynlinin məhkəmə istintaqı başa çatıb.
Sumqayıt24-ün məlumatına görə, Sumqayıt Ağır Cinayətlər Məhkəməsində keçirilən iclasda prokuror bəyan edib ki, təqsirləndirilən şəxs törətdiyi cinayətə görə ömrü boyu evinə qayıtmağa layiq deyil. Bu əsasla Fərid qanunun icazə verdiyi ən ağır cəzaya məhkum edilməli, qalan ömrünü həbsxanada keçirməlidir.
Zərərçəkmiş tərəf də bu tələbdən razı qalıb.
Müdafiə tərəfinə çıxışa hazırlanması üçün vaxt verilib.
Qeyd edək ki, dəhşətli cinayət ötən ilin iyununda Qobu qəsəbəsində qeydə alınıb. İttihama görə, 30 yaşlı Fərid Hüseynli yaşadıqları evdə əvvəlcə 20 yaşlı arvadı Leylanı, sonra isə və 8 aylıq körpəsi Aylanı bıçaqlayaraq öldürüb. O, intihar etmək istəyib, amma həyatını xilas etmək mümkün olub.
Leyla Bakı Dövlət Universitetinin üçüncü kurs tələbəsi olub. O, biologiya müəllimliyi ixtisası üzrə təhsil alırdı.
Bu işin məhkəmə istintaqı qapalı keçirildiyi üçün cinayətin səbəbləri bilinmir.
