Sumqayıt bulvarında dava zamanı 17 bıçaq zərbəsi vuran Rahib Yunusova hökm oxunub. Bu barədə 10 yanvar tarixində Sumqayıt24 Pravda.az-a isinadən xəbər verir.
Çinayət işi Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilib. Məhkəmənin hökmü ilə İlkin İbişova bıçaqla xəsarətlər yetirərək qəsdən adam öldürməyə cəhddə təqsirləndirilən R. Yunusov 8 il müddətinə azadlıqdan məhrum edilib.
Qeyd edək ki, hadisə 2022-ci il sentyabrın 28-i günorta radələrində qeydə alınıb.
2017-ci ildən Sumqayıt şəhəri Telefon qovşağında Cari planlama sektorunun müdiri vəzifəsində çalışan İlkin İbişovla Rahibin rəsmi olaraq boşandığı, lakin birlikdə yaşadığı həyat yoldaşı Sona (şərti) evə internet xətti çəkdirən zaman tanış olublar. Onlar “WhatsApp” vasitəsilə yazışanda Rahib keçmiş arvadından şübhələnib. Xüsusi proqram vasitəsilə həyat yoldaşının “WhatsApp”ını izləyib.
Hadisə günü evdən işə getmək adı ilə çıxıb, lakin çöldə gözləyib. Bu zaman İlkin onların evlərinin qarşısında “Mercedes-Benz” markalı avtomobilini saxlayıb. Arvadı ilə azyaşlı qızı maşına əyləşib və ərzindən uzaqlaşıblar. Rahib isə taksiyə əyləşərək maşını onların arxası ilə sürdürüb. İlkin əvvəl məktəbin qarşısında avtomobili saxlayıb, Rahibin qızı məktəbə gedib. Sonra onlar dənizkənarı bulvara gəliblər. Sona maşından düşüb qarşı tərəfdə əyləşib. Rahib “Mercedes-Benz”ə yaxınlaşanda o, İlkinin arvadının əlindən tutduğunu görüb. Bu zaman o, maşının qapısını açaraq İlkinin yaxasından tutub çölə çıxarıb. Sona isə avtomobildən düşərək qaçıb. Dava zamanı Rahib İlkinə ümumilikdə 17 bıçaq zərbəsi vurub.
Daha sonra xəstəxanaya yerləşdirilən yaralının həyatını xilas etmək mümkün olub.
