Bir nəfəri öldürməkdə və onun yeniyetmə oğlunu isə bıçaqlamaqda təqsirləndirilən Şəhram Manafzadənin cinayət işi üzrə məhkəməsi yekunlaşıb.
Məlumata görə, Sumqayıt Ağır Cinayətlər Məhkəməsində keçirilən prosesdə məhkəmə istintaqı yekunlaşıb.
Dövlət ittihamçısı Ziya Mansurov ittiham nitqi ilə çıxış edərək məhkəməyə təqsirləndirilən şəxsin 20 il müddətinə azadlıqdan məhrum edilməsini təklif edib.
Zərərçəkmiş şəxsin hüquqi varisinin nümayəndəsi Vasif İsrafilov təqsirləndirilən şəxsin ömürlük azadlıqdan məhrum edilməsini istəyib.
Təqsirləndirlilən şəxsin vəkili müdafiə çıxışı etdikdən sonra Şəhram Manafzadə son söz deyib.
Məhkəmə müşavirəyə gedib qayıtdıqdan sonra hökmü elan edib.
Hökmə əsasən, Şəhram Manafzadə 20 il müddətinə azadlıqdan məhrum edilib.
Qeyd edək ki, hadisə 2024-cü ilin avqustunda Xaçmaz rayonu Nabran qəsəbəsində baş verib.
Araşdırma zamanı məlum olub ki, Xaçmaz rayonunun Köhnə Xudat kəndinin sakinləri 1988-ci il təvəllüdlü Nurlan Məmmədrəhimov və oğlu 2009-cu il təvəllüdlü Cavidan Məmmədrəhimov tanıdıqları - 1990-cı il təvəllüdlü Şəhram Manafzadə tərəfindən aralarında yaranan mübahisə zamanı bıçaqlanıblar.
Nəticədə, 15 yaşlı Cavidan Məmmədrəhimov aldığı bıçaq xəsarətlərindən hadisə yerində ölüb. Nurlan Məmmədrəhimov isə Xaçmaz Rayon Mərkəzi Xəstəxanasına yerləşdirilib.
Hadisəni törədən Şəhram Manafzadə hadisə yerindən yayınsa da, Xaçmaz polisi onu Nabranda yaxalayıb istintaqa təhvil verib.
Şəhram Manafzadə qarşı Cinayət Məcəlləsinin 120.2.2-ci (Xuliqanlıq niyyəti ilə adam öldürmə), 120.2.3-cü (zərərçəkmiş şəxsin ictimai borcunu yerinə yetirməsi ilə əlaqədar qəsdən adam öldürmə), 120.2.4-cü (xüsusi amansızlıqla və ya ümumi təhlükəli üsulla adam öldürmə), 29, 120.2.2-ci (Xuliqanlıq niyyəti ilə adam öldürməyə cəhd), 29, 120.2.4-cü (xüsusi amansızlıqla və ya ümumi təhlükəli üsulla adam öldürməyə cəhd), 29, 120.2.7-ci (qəsdən iki və ya daha çox şəxsi öldürməyə cəhd etmə), 134, 221.3-cü (xuliqanlıq) və 228.4-cü (qanunsuz olaraq odlu və soyuq silah əldə etmə və gəzdirmə) maddələri ilə ittiham irəli sürülüb.
Mənbə: Unikal.аz
