Sumqayıtda narkotik vasitələrin dövriyyəsi ilə məşğul olan 4 nəfər saxlanılıb. Sumqayıt24 bu haqda 24 oktyabr tarixində Daxili İşlər Nazirliyinə istinadən xəbər verir.
Polis əməkdaşları tərəfindən silsilə əməliyyatlar keçirilib. Nəticədə əvvəllər məhkum olunmuş Xanlar İbayev, Teymur Məmmədov, İlham Mirzəyev və Ruqiyyə Əsgərova tutularaq istintaqa təqdim ediliblər. Onlardan ümumilikdə 3 kiloqrama yaxın heroin və psixotrop tərkibli metadon həbləri aşkar olunub.
Onlar öz ifadələrində narkotiki sosial şəbəkələr vasitəsilə əlaqə yaratdıqları naməlum şəxslərdən əldə etdiklərini və satmaq istədiklərini bildiriblər.
Qeyd edək ki, Ruqiyyə Əsgərova ötən ay narkotik alverinə görə tutulsa da, qadın olması və yaşı nəzərə alınaraq, polis nəzarəti altında azadlığa buraxılmışdır. Lakin o, yenidən narkotiklərin qanunsuz dövriyyəsini təşkil edib. Həmçinin onun oğlu Pərviz Əsgərov da eyni səbəbdən bir neçə ay bundan əvvəl saxlanılıb.
Faktlarla bağlı cinayət işləri başlanılıb, saxlanılan şəxslər barəsində həbs qətimkan tədbiri seçilib.
