Sumqayıtda “Azərişıq” ASC-nin əməkdaşını bıçaqlamaqda ittiham olunan 35 yaşlı Mübariz Mahmudov məhkəmə zalından azad buraxılıb. Sumqayıt24 bu haqda 29 iyun tarixində Bizim.media-ya istinadən xəbər verir.
Hadisə 13 dekabr 2021-ci ildə, 13-cü mikrorayon, ev 36 ünvanında baş verib. Mübariz Mahmudov və onun enerji xəttinə baxış keçirən nəzarətçi mühəndis Vaqif Bədəlov arasında mübahisə yaranıb.
İfadə verən Mübariz özünü qismən təqsirli bilsə də, heç kimə xəsarət yetirmədiyini və “Azərişıq” QSC-nin əməkdaşları ilə mübahisə edərkən üzərində bıçaq olmadığını deyib.
Məhkəmənin hökmü ilə o, 1 il 7 ay 2 gün müddətinə azadlığın məhdudlaşdırılması cəzasına məhkum olunub.
Lakin onun barəsində seçilmiş həbs qətimkan tədbiri dəyişdirilib. Barəsində “Başqa yerə getməmək” haqqında iltizam qətimkan tədbiri seçilib.
