Narkokuryerliklə məşğul olan Sumqayıt sakini və daha 2 şəxs Balakəndə saxlanılıblar. Sumqayıt24 bu haqda Report-a istinadən xəbər verir.
Zaur Rzayev və paytaxt sakinləri, əvvəllər bir neçə dəfə məhkum olunmuş Nurlan Rzayev və Elçin Kərəkməzli Balakən Rayon Polis Şöbəsinin əməkdaşları tərəfindən tutulublar. Z. Rzayevin idarə etdiyi “Toyota” markalı avtomobildə 7 kiloqram 400 qram qurudulmuş marixuana, 2 kiloqrama yaxın heroin və 312 qram metamfetamin (“patı”) aşkarlanıb. N. Rzayevin üzərindən isə heroin aşkar edilərək götürülüb.
Araşdırma zamanı müəyyən edilib ki, Nurlan sosial şəbəkələr vasitəsilə qonşu ölkələrdən birində yaşayan və Azərbaycana narkotik maddələr göndərən şəxsin təklifi əsasında narkokuryerliyə cəlb olunub.
Sonuncu dəfə, həmin əcnəbi şəxsin narkotik vasitəni Balakən rayonu ərazisindən Gürcüstana keçirmək cəhdi baş tutmayıb. Bu səbəbdən o, kuryerindən Balakəndə olan narkotik vasitəni götürüb, Bakıya aparmasını istəyib və bunun müqabilində 5 min manat verəcəyini söz verib.
Nəticədə N. Rzayev tanışları Z. Rzayev və E. Kərəkməzli ilə birlikdə, narkotik vasitəni ona göndərilən şəkillərdə göstərilən yerdən götürüb, geri qayıdarkən isə polis əməkdaşları tərəfindən saxlanılıblar.
Onlar maddi sübutlarla birlikdə istintaqa təhvil verilib. Faktla bağlı araşdırmalar davam etdirilir.
