Sumqayıtda dələduzluqda təqsirləndirilən Turan Məmmədov (soyad şərtidir) barəsindəki hökmdən verilən apellyasiya şikayətinə baxılıb. Bu haqda 24 noyabr tarixində Sumqayıt24 Pravda.az-a istinadən məlumat verir.
Sumqayıt Apellyasiya Məhkəməsində hakim Elman Əhmədovun sədrliyi ilə keçirilən prosesdə qərar elan olunub. Qərara əsasən, 2 il 6 ay müddətinə azadlıqdan məhrumetmə hökmü ləğv edilib, Məmmədov cinayət məsuliyyətindən azad olunub və işin icraatına xitam verilib.
Təqsirləndirilən şəxs barəsində seçilmiş həbs qətimkan tədbiri ləğv edilib və Turan Məmmədov saxlanıldığı cəzaçəkmə müəssisəsindən dərhal həbsdən azad olunub.
İttihama görə, Turan Məmmədov 2022-ci ilin avqust ayında dəqiq günü istintaqa məlum olmayan tarixdə Facebook sosial şəbəkəsində tanış olduğu şəxsin rəfiqəsi, zərərçəkmiş Maya Kərimovanı (şərti) dövlət xəstəxanalarının birində tibb bacısı kimi işə düzəldəcəyi adı ilə yalan vədlər verib. Turan həmin qadının ümumilikdə 5600 manat pulunu dələduzluq yolu ilə ələ keçirib. Daha sonra qadın şikayət edib və Turan Məmmədov cinayət məsuliyyətinə cəlb edilib.
