Həyat yoldaşını bıçaqlayan kişiyə hökm oxunub. Bu haqda məlumatı Sumqayıt24 yanvarın 6-da Qaynarinfo-ya istinadən məlumat verir.
Hadisə ötən il may ayının 9-da Bakıda yerləşən "Təbrik" şadlıq sarayının həyətində baş verib. Sumqayıt şəhərində anadan olmuş 42 yaşlı Ceyhun Səlimov (soyad şərti verilib) rəsmi nikahda olduğu həyat yoldaşı Vüsaləni bıçaqlayıb.
Qanunsuz əməlin törədilməsinə səbəb qadının sosial şəbəkələrdən istifadə etməsi olub. Kişi bir neçə dəfə həyat yoldaşına bunu etməməyi deyib. Nəticədə o, Vüsalənin mobil telefonunu əlindən alıb. Xanım isə evdən qaçaraq "Təbrik" şadlıq sarayında qabyuyan kimi işə düzəlib.
Ceyhun uzun müddət axtarışlardan sonra arvadını tapıb, onunla söhbət edib. Aralarında yaranan mübahisə zamanı isə kişi qadını bıçaqlayıb.
Məhkəmədə Ceyhun törətdiyi əməldən peşman olduğunu deyib. Vüsalə isə bıçaqlanmasında özünü günahkar görüb. Zərərçəkmiş şəxs bildirib ki, o, əri Ceyhunu təhqir etməsəydi, kişi ona xəsarət yetirməzdi.
Vüsalə əri Ceyhunla barışdığını deyib. Ər-arvad kimi birlikdə yaşadıqlarını deyən qadının sözlərinə görə, barışığın əldə edilməsi üçün ona heç kəs təzyiq göstərməyib, əksinə, öz iradəsi ilə təqsirləndirilən şəxslə barışıb.
Məhkəmənin hökmü ilə Ceyhun Səlimov Cinayət Məcəlləsinin 126.1-ci maddəsində nəzərdə tutulmuş cinayətin törədilməsində təqsirli bilinib və ona 3 il 6 ay müddətinə şərti azadlıqdan məhrum etmə cəzası təyin olunub.
O, məhkəmə zalından azadlığa buraxılıb.
