Gənc cüdoçu Turan Rüstəmovu qətlə yetirməkdə təqsirləndirilən şəxsin məhkəmə zamanı verdiyi ifadəsi məlum olub. Bu haqda 21 iyun tarixində Sumqayıt24 Patrul.az-a istinadən məlumat verir.
Bakı Ağır Cinayətlər Məhkəməsində keçirilən prosesdə təqsirləndirilən Ruslan Səfixanov elan edilmiş ittiham üzrə özünü qismən, yəni Cinayət Məcəlləsinin “qəsdən adam öldürmə” maddəsi ilə təqsirli bilib.
Ruslan Səfixanovun sözlərinə görə, Şağan Olimpiya İdman Kompleksində yetkinlik yaşına çatmayan idmançılar arasında idman yarışları keçirilirdi. Həmin yarışa Sumqayıtdan məşqçilərin rəhbərliyi ilə 9 nəfərlik heyət gəlmişdi. O isə psixoloji və mənəvi dəstək vermək üçün həmin komanda ilə yarışa qoşulub.
Təqsirləndirilən şəxs deyib ki, yetkinlik yaşına çatmayan zərərçəkmiş Turan Rüstəmovu həmin günədək tanımayıb, onunla birgə yarışlarda olmayıb, heç bir ədavəti və düşmənçiliyi olmayıb. Həmin gün saat 10 radələrində yarış başlanılıb, təxminən saat 12 radələrində komanda üzvləri olan Elmir və Kənanla birlikdə idman kompleksinin yanında yerləşən marketə gedərək oradan çörək, pendir, kolbasa, 0,5 litr həcmdə spirtli içki olan araq alaraq idman kompleksinə qayıdıb. Geri qayıdıb nahar etməyə başlamaq istəyəndə məlum olub ki, aldıqları ərzaqları doğramaq üçün bıçaq yoxdur. Bu səbəbə görə idman kompleksinin yaxınlığında yerləşən adını bilmədiyi inşaat malları mağazasından bir ədəd mətbəx bıçağı alıb, geri qayıdıb. Nahar zamanı aldığı 0,5 litr həcmində araqdan 100 qramını soyuq çayla qarışdıraraq içib.
Ruslan bildirib ki, saat təxminən 14 radələrində komandanın yarışını tatamiyə yaxın məsafədə yerləşən tribunadan izləmək üçün pilləkənlərlə tribunaya doğru qalxan zaman Turanın orada tək oturduğunu görüb:
“Turan ayaqlarını qarşısındakı oturacağın üzərinə qoyduğu üçün mənim oturmağıma maneə yaratdı. Ona buna görə irad tutaraq ayaqlarını oturacaqdan endirməsini tələb etdim. Cavabında Turan məni söyüb təhqir etdi. Bu səbəbdən Turana bir şillə vurdum. Turan isə mənə təpik və yumruq atdı, mən də onu vurdum . Bu zaman Turan məni ağır söyüşlə söydüyü üçün şalvarımın belinə qoyduğum bıçağı çıxardım. Lakin həmin bıçaqla Turana yetirdiyim xəsarətlərin sayını artıq xatırlamıram. Çünki özümdə olmamışam. O zaman ayıldım ki, polislər məni tutub saxlayıb və bıçağın əlimi də kəsdiyini gördüm. Bir daha bildirirəm ki, zərərçəkmiş şəxs 2-ci dəfə ailə üzvlərimi söydüyü üçün bu cinayəti törətdim”.
Qeyd edək ki, məhkəmənin hökmü ilə R. Səfixanov 19 il müddətinə azadlıqdan məhrum edilib.
