Narkotik alveri ilə məşğul olan Sumqayıt sakini Ramilə Qurbanova saxlanılıb. Sumqayıt24 bu haqda 1 may tarixində Daxili İşlər Nazirliyinə (DİN) istinadən xəbər verir.
Səbail Rayon Polis İdarəsinin əməkdaşları tərəfindən tutulan qadından heroin götürülüb. Ramilə Qurbanova heroini Emil adlı tanışından şəxsi istifadəsi üçün aldığını və onun göstərişi ilə narkokuryerliyə cəlb olunduğunu deyib.
İdarə əməkdaşları tərəfindən keçirilən əməliyyat nəticəsində Salyan rayon sakini Emil Hacıyev də ələ keçib. Onun üzərindən və yaşadığı evdən 2 kiloqrama yaxın heroin, metamfetamin, 15 kiloqram marixuana, 56 ədəd psixotrop tərkibli metadon, həmçinin preqabalin həbi, 3 ədəd elektron tərəzi, bank kartları, qeyd dəftərçələri, narkotiklərin onlayn satışı ilə məşğul olduğunu sübut edən qəbzlər və sair maddi sübutlar aşkar edilib.
Emil narkotiki sosial şəbəkələrdə tanış olduğu “Əsgər” adlı İran vətəndaşından aldığını, həmin şəxsin göstərişi ilə Bakıda narkotik vasitələrin satışını təşkil etdiyini bildirib.
Faktlarla bağlı araşdırmalar aparılır.
