Üç nəfərə ağır xəsarət yetirən Sumqayıt sakininin məhkəməsi bitib. Sumqayıt24 bu haqda 29 noyabr tarixində Pravda.az-a istinadən xəbər verir.
Proses Gəncə Ağır Cinayətlər Məhkəməsində hakim Natiq Əliyevin sədrliyi ilə keçirilib. Hökmə əsasən, Babək Nəsirov 8 il 6 ay müddətinə azadlıqdan məhrum edilib.
Qeyd edək ki, hadisə 30 yanvar 2023-cü ildə baş verib. Sumqayıt sakini, 34 yaşlı Babək Nəsirov Gəncədə qeyri-rəsmi ər-arvad münasibətlərində yaşadığı 30 yaşlı Elnurə Əlimərdanova ilə mübahisə edib. Səbəb isə kişinin iki azyaşlı övladlarını özü ilə birlikdə aparması olub.
Nəticədə o, qadını boyun nahiyəsindən bıçaqlayıb. Həmçinin Nəsirov onun 31 yaşlı qardaşı Elnur Əlimərdanovu kürəyindən, əmiləri, 43 yaşlı Elşən Əlimərdanovu isə boyun nahiyəsindən bıçaqlayıb.
Zərərçəkənlər xəstəxanaya yerləşdirilərək cərrahiyyə əməliyyatı olunublar. Nəsirov isə hadisə yerindən qaçıb. O, Sumqayıt şəhərində saxlanılaraq istintaqa təhvil verilib.
