Arvadını xüsusi amansızlıqla öldürən və qızını döyən Vüqar Nəmətovun kassasiya şikayətinə baxılıb. Sumqayıt24 bu haqda 10 may tarixində Pravda.az-a istinadən xəbər verir.
Ali Məhkəmədə hakim Ələsgər Novruzovun sədrliyi ilə keçirilən prosesdə qərar elan olunub. Kassasiya şikayəti təmin edilməyib.
Qeyd edək ki, Sumqayıt Ağır Cinayətlər Məhkəməsi kişini 19 il müddətinə azadlıqdan məhrum edib. Sumqayıt Apellyasiya Məhkəməsi Vüqar Nəmətovun şikayətini təmin etməyib.
Hadisə 22 oktyabr 2022-ci ildə baş verib. Abşeron rayon prokurorluğuna Saray qəsəbə sakini, 1995-ci il təvəllüdlü Səidə Nəmətovanın yaşadığı evdə öldürülməsi barədə məlumat daxil olub.
Araşdırmalarla zərərçəkmişin əri, 1994-cü il təvəllüdlü Vüqar Nəmətovun 2015-ci il təvəllüdlü qızını döyməsinə, qızını qorumağa çalışan hamilə Səidə Nəmətovanı isə dəmir boru ilə yaralayaraq qəsdən öldürməsinə əsaslı şübhələr müəyyən edilib. O, şübhəli qismində tutulub.
Vüqar barəsində Cinayət Məcəlləsinin 120.2.8-ci (təqsirkar şəxs üçün aşkar surətdə hamilə vəziyyətində olan qadını öldürmə), 120.2.3, 120.2.4 və 128-ci maddələri ilə ittiham irəli sürülüb.
İttihama görə, hadisədən əvvəl Vüqarın 7 yaşlı qızı “Al Market” mağazasından 37 manat dəyərində müxtəlif şirniyyat məhsulları oğurlayıb. O, 25-26 həftəlik hamilə arvadı Səidənin də bundan xəbəri olmasına görə əsəbiləşib. Qızını cəzalandırmaq məqsədilə onu boru parçası ilə döyüb. Bu zaman Səidə ona yaxınlaşaraq borunu əlindən alıb və itələyib. Vüqar buna daha da əsəbiləşərək dəmir parçası ilə Səidəni döyərək öldürüb.
