Sumqayıt sakini Ruslan Məmmədovun qətli ilə bağlı cinayət işinin istintaqı tamamlanıb. Sumqayıt24 bu haqda 8 dekabr tarixində Baş Prokurorluğa istinadən xəbər verir.
Hadisə avqustun 19-da baş verib. Bildirilib ki, Stanislav Yakuşev rayonun Masazır kəndindəki istifadəsiz köşkdə Ruslan Məmmədovla spirtli içki qəbul edib. Sonra onların arasında mübahisə yaranıb. Abşeron rayon prokurorluğunda aparılan istintaqla Yakuşevin tanışının başına daşla vuraraq qəsdən öldürməsi, üzərində olan mobil telefonu oğurlamasına dair əsaslı şübhələr müəyyən edilib.
Stanislav Yakuşevə Cinayət Məcəlləsinin 120.1 (qəsdən adam öldürmə), 177.2.2 (təkrar oğurluq etmə) və digər maddələri ilə yekun ittiham elan edilib. Cinayət işi baxılması üçün Sumqayıt Ağır Cinayətlər Məhkəməsinə göndərilib.
